ພົນເອກ ຈັນສະໝອນ ຈັນຍາລາດ ຕ້ອນຮັບຄະນະຜູ້ແທນກົມເສນາຮັກ
ກົມໃຫຍ່ພະລາທິການກອງທັບປົດປ່ອຍປະຊາຊົນຈີນ
ໃນວັນທີ 6 ມີນາ 2023, ສະຫາຍ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ ໄດ້ຕ້ອນຮັບຄະ ນະຜູ້ແທນກົມເສນາຮັກ ກົມໃຫຍ່ພະລາທິການກອງທັບປົດປ່ອຍປະຊາຊົນຈີນ ເຂົ້າຢ້ຽມຂ່ຳນັບ ນຳໂດຍ ສະຫາຍ ພັນເອກ ພິເສດ ຮາວ ຫລິນຢວນ ເນື່ອງ ໃນໂອກາດທີ່ຄະນະເດີນທາງມາຢ້ຽມຍາມ ແລະ ເຮັດວຽກ ຢູ່ ສປປ ລາວ ໃນລະຫວ່າງວັນທີ 5-9 ມີນາ 2023.
ສະຫາຍ ພັນເອກ ພິເສດ ຮາວ ຫລີນຢວນ ໄດ້ລາຍງານເນື້ອໃນຈຸດປະສົງໃນການມາ ຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ແມ່ນເພື່ອ ແລກປ່ຽນຄຳຄິດເຫັນ, ລົງກວດສະຖານທີ່ສ້າງສູນວິໄຈພະຍາດເຂດຮ້ອນ, ເພື່ອຍົກລະດັບໂຮງໝໍສູນກາງ 103 ກອງທັບປະຊາຊົນລາວ ໃຫ້ມີຫ້ອງວິໄຈໃນ ການຊອກຄົ້ນຫາເຊື້ອພະຍາດຊຶມເຊື້ອໄດ້ງ່າຍ ແລະ ວ່ອງໄວ ເພື່ອເຮັດໃຫ້ໂຮງໝໍສູນກາງ 103 ກອງທັບເປັນໂຮງໝໍທີ່ທັນສະໄໝ.
ສະຫາຍ ພົນເອກ ຈັນສະໝອນ ຈັນຍາລາດ ກໍໄດ້ກ່າວສະແດງຄວາມຕ້ອນຮັບອັນອົບອຸ່ນ ແລະ ຍ້ອງຍໍຊົມເຊີຍຕໍ່ຄະນະຜູ້ແທນກົມເສນາຮັກ ກົມໃຫຍ່ ພະລາທິການກອງທັບປົດປ່ອຍປະຊາຊົນຈີນ ທີ່ໄດ້ເດີນທາງມາຢ່ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້, ເຊິ່ງເປັນບາດກ້າວອັນສຳຄັນໃນການປະ ກອບສ່ວນການຊ່ວຍເຫຼືອຂອງ ສປ ຈີນ ຕໍ່ກອງທັບປະຊາຊົນລາວ ເວົ້າລວມເວົ້າສະເພາະກໍແມ່ນໂຄງການໂຮງໝໍສູນກາງ 103 ກອງທັບ, ໂຄງການຂະ ບວນລົດໄຟສັນຕິພາບທີ່ຜ່ານມານັ້ນ, ໄດ້ຮັບຜົນສຳເລັດອັນຈົບງາມ. ນອກນີ້, ຍັງໄດ້ເນັ້ນໜັກໃຫ້ສືບຕໍ່ກວດກາສະຖານທີ່ເພື່ອສ້າງສູນວິໄຈພະຍາດເຂດ ຮ້ອນ ໃຫ້ມີຄວາມເໝາະສົມ ແລະ ໄດ້ຮັບໝາກຜົນສູງ. ຂ່າວຍັງແຈ້ງໃຫ້ຮູ້ຕື່ມອີກວ່າ: ໃນໂອກາດດຽວກັນນີ້, ຄະນະຜູ້ແທນກົມເສນາຮັກ ກົມໃຫຍ່ພະລາ ທິການກອງທັບປົດປ່ອຍປະຊາຊົນຈີນ ຍັງໄດ້ພົບປະສອງຝ່າຍກັບ ສະຫາຍ ພົນຕີ ຄຳເພັດ ສີຊານົນ ຫົວໜ້າກົມໃຫຍ່ພະລາທິການກອງທັບ ແລະ ສະຫາຍ ພົນຈັດຕະວາ ຄຳແພງ ພູມມະແກ້ວ ຫົວໜ້າກົມເສນາຮັກ ກົມໃຫຍ່ພະລາທິການກອງທັບປະຊາຊົນລາວຕື່ມອີກ.
ແຫຼ່ງທີ່ມາ: ວິໄລພອນ
ວັນທີ 07/03/2023